Cəlilabad rayonunda arvadını öldürməkdə təqsirli bilinən 1983-cü il təvəllüdlü Orxan Səlimovun (cinayət işində adı keçən şəxslərin ad və soyadları şərti verilib – red.) cinayət işi üzrə məhkəmə prosesi başa çatıb.
Gununsesi.org xəbər verir ki, Orxan Səlimov 2015-ci ilin sentyabrın əvvəllərində arvadı Səbinənin istifadəsində olan mobil telefonda başqa kişilərlə yazışdığını bilib, ona xəyanət etməsindən şübhələnib.
Ər-arvadın davası
Bu səbəbdən qısqanclıq zəminində Orxan Səlimov Səbinəni öldürmək qərarına gəlib. Sentyabrın 12-də, saat 18 radələrində bu zəmində onların aralarında mübahisə yaranıb.
Mübahisə edən Səbinə daha sonra ər evindən çıxıb və atasının evinə yollanıb. Bir qədər sonra Orxan Səbinəyə zəng edib, onu bağışlayacağını deyib, ondan evə qayıtmasını xahiş edib.
Bıçağı xalçanın arasında gizlətdi
Orxan Səbinənin evə qayıdacağı barədə razılığını aldıqdan sonra Cəlilabad rayonundakı “Yeni Gənclik” mağazasına gedib və oradan bir tərəfi kəsici və iti olan təzə bıçaq alıb.
Evə qayıdan Orxan bıçağı xalçanın arasında gizlədib və sonra qayınatası Əligilə gedib və arvadını, 2013-cü il təvəllüdlü azyaşlı qızı Səidəni yaşadığı evə gətirib.
Gecəyarısı cinayət
Gecə saat 02 radələrində Orxan yaşadığı mənzildə arvadının azyaşlı qızı ilə birlikdə yataq otağındakı çarpayıda yatdıqlarına əmin olub. O, cinayətkar niyyətini həyata keçirmək məqsədilə əvvəlcədən digər otaqda gizlətdiyi bıçağı götürüb və arvadının yatdığı çarpayıya yaxınlaşıb.
Bu zaman Orxan yuxuda olduğu üçün ona müqavimət göstərmək imkanı olmayan Səbinənin oyanacağı təqdirdə hərəkətini məhdudlaşdırmaq məqsədi ilə dizi ilə sol qolundan, əli ilə başından tutub, sonra bıçaqla onun boyun nahiyəsini kəsib.
Azyaşlı qızın gözü qarşısında arvadının başını kəsdi
Bu vaxt Səbinə yuxudan oyanıb və yataqdan qalxaraq pəncərəyə tərəf qaçıb. O, köməyə adam çağırdıqda isə anasının qışqırıq səslərinə azyaşlı qız yuxudan oyanıb.
Bu zaman Orxan azyaşlı qızının gözü qarşısında bıçaqla Səbinənin bədəninin müxtəlif nahiyələrinə çoxsaylı zərbələr vurub. O, sonra Səbinəni yenidən yatağa uzadıb və bıçaqla boyunun qalan hissəsini də kəsib.
Cinayəti törətdi və evi tərk etdi
Bu hərəkətləri ilə Orxan Səbinəni qəddarcasına həyətdan məhrum edib. Cinayətini başa çatdıran Orxan daha sonra bıçağı həmin otaqda yerə atıb və paltarını dəyişərək evi tərk edib.
Səhər açılan kimi Orxan Cəlilabad rayon polis şöbəsinə gəlib və törətdiyi cinayəti etiraf edib. O, polisə könüllü təslim olub, arvadını namus üstündə öldürdüyünü deyib.
Arvadını öldürdüyünü etiraf etdi, iki maddə ilə iş açıldı
İstintaq orqanı tərəfindən Orxan Səlimovun barəsində Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə) və 120.2.9-cu (təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı adam öldürmə) maddələri ilə ittiham elan edilib.
Bu cinayət işi Lənkəran Ağır Cinayətlər Məhkəməsində hakim Xamməd Nuriyevin sədrlik etdiyi kollegiyada baxılıb. Məhkəmə işin hallarını araşıdırandan sonra Orxan Səlimovun barəsində hökm elan edib.
17 il cəza
Hökmə əsasən, Orxan Səlimovun arvadını xüsusi amansızlıqla və təhlükəli üsulla öldürdüyü tam sübuta yetirilib. Məhkəmə onun barəsində 17 il müddətinə azadlıqdan məhrum etmə cəzası təyin edib.
Hökmdə qeyd olunub ki, Orxan Səlimov cəzasını ciddi rejimli cəzaçəkmə müəssisəsində çəkməli olacaq.
Hökmdən narazı qalan Orxan Səlimov apelyasiya şikayəti verib. O, ittiham olunduğu maddələrin dəyişdirilməsini, barəsində Cinayət Məcəlləsinin 122.1-ci (zərərçəkmiş şəxs tərəfindən edilən zorakılıq, ağır təhqir və ya sair qanunsuz və ya əxlaqsız hərəkətlər (hərəkətsizlik) nəticəsində, habelə zərərçəkmiş şəxsin mütəmadi qanunsuz və ya əxlaqsız davranışı ilə əlaqədar yaranmış uzun sürən dözülməz psixi şərait nəticəsində qəflətən baş vermiş güclü ruhi həyəcan (affekt) vəziyyətində qəsdən adam öldürmə) maddəsi ilə ittiham verilməsini, həmin maddənin sanksiyası çərçivəsində cəzalandırılmasını istəyib.
Şikayət etdi, rədd edildi
Bu şikayət Şirvan Apelyasiya Məhkəməsində İsmayıl Əhmədovun sədrlik etdiyi kollegiyada araşdırılıb. Apelyasiya şikayətinin dəlillərini araşdıran hakim qərar elan edib. Qərara görə, apelyasiya şikayəti təmin olunmayıb.
Bu qərardan narazı qalan Orxan Səlimov kasasiya şikayəti verib. Onun kasasiya şikayəti araşdırılması üçün Ali Məhkəməyə göndərilib.
Hakim Hafiz Nəsibovun sədrlik etdiyi kollegiyada kasasiya şikayəti araşdırılıb və sonda qərar elan edilib. Qərara görə, Orxan Səlimovun kasasiya şikayəti təmin olunmayıb.
