Bu ayın sonunadək Türkiyədən deportasiya ediləcək terrorçuların arasında 29 nəfər azərbaycanlının da adı var.
Bəs, Azərbaycana deportasiya ediləcək terrorçuları hansı aqibət gözləyir? Qanunvericilikdə hansı cəzaların tətbiq olunması nəzərdə tutulur?
Gununsesi.org xəbər verir ki, tanınmış vəkil və hüquqşünas Əsabəli Mustafayev Cebhe.info-ya açıqlamasında bildirib ki, siyahıda vətəndaşlıq deyil, milliyyət göstərilib:
“Buna görə də onlardan bəzilərinin Azərbaycan vətəndaşı olmaması da mümkündür. Əgər onlar Azərbaycandan gediblərsə, ölkəyə daxil olduqları zaman ilk növbədə həbs olunacaqlar. Araşdırma aparılacaq, onların qanunsuz silahlı dəstələrin iştirakçısı olduğu sübut olunarsa, onlar silahlı dəstələrin tərkibində olmaq, vuruşmaq maddələri ilə mühakimə olunacaqlar. Burada ömürlük həbs cəzasına qədər cəzanın verilməsi mümkündür. Amma hər halda bu istintaqın gedişatından və məhkəmənin qiymətindən asılı olacaq”.
Hüquqşünas Azərbaycanda belə bir təcrübənin yaşandığını dedi:
“Həmin ittihamların elan olunduğu bir neçə nəfər var ki, onlar hazırda ömürlük həbs cəzasına məhkum ediliblər. Onların hansı ölkədə qruplara qoşulmasının heç bir fərqi yoxdur”.
Gununsesi.org
