Müasir İnkişaf Birliyi, Bakı şəhər Gənclər və İdman Baş İdarəsi, Gənclərin Töhfəsi Birliyi Rəşid Behbudov adına Mahnı Teatrında Türk Dövlətlərinin Birliyi Günü – Dünya Türklərinin Həmrəylik Günü münasibətilə tədbir keçirib. Rəsmi və bədii hissədən ibarət olan tədbirdə millət vəkili Hikmət Babaoğlu, ziyalılar, diplomatik korpus və QHT təmsilçiləri, dövlət qurumlarının nümayəndələri, gənclər, sənətçilər, jurnalistlər və s. iştirak ediblər.
Tədbir “Ey Turanım!” mahnısının sədaları altında səhnəyə türk ölkələrinin bayraqlarının gətirilməsi və xlaq şairi Zəlimxan Yaqubun “Əzəl axır dünya bizim olacaq” şerinin səsləndirilməsilə başlayıb.
Millət vəkili, “Yeni Azərbaycan” qəzetinin baş redaktoru Hikmət Babaoğlu çıxışında qədim türk torpağı Naxçıvanda Türk Konseyinin yaradılması ilə bağlı qərarın verilməsini yüksək dəyərləndirib. H.Babaoğlu dünyada gedən qloballaşmanın qarşısında duruş gətirə bilmək üçün milli-etnik dəyərlərə sığınmağın vacib olduğunu vurğulayıb: “Bu həm də əcdadlarımıza bir vəfa borcudur”. H.Babaoğlu türk birliyi istiqamətində dövlətlər səviyyəsində iş aparılmasının və ictimai təşkilatların da buna dəstək verməsinin əhəmiyyətindən bəhs edib. O, böyük türk birliyinin Qarabağdan keçdiyini qeyd edərək, hər kəsi Ali Baş komandan İlham Əliyevin ətrafında sıx birləşməyə çağırıb. Millət vəkili 3 oktyabr tarixinin həm də ümummilli lider Heydər Əliyevin demokratik şəkildə keçirilmiş səsvermə nəticəsində prezident seçilməsinin ildönümü olduğunu qeyd edərək bu hadisənin tarixi əhəmiyyətindən danışıb.
Türkiyə səfirinin birinci müavini Barış Saygın oktyabrın önəmli bir ay olduğunu qeyd edərək, qarşıdakı günlərdə Azərbaycanda Türk Konseyinin növbəti toplantısının keçiriləcəyini xüsusi vurğulayıb. O, “Bir millət, iki dövlət” fikrini söyləyərək Azərbaycanla-Türkiy arasındakı qardaşlıq münasibətlərini diqqətə çatdırıb.
Müasir İnkişaf Birliyinin sədri Mübariz Göyüşlü təmsil etdiyi təşkialtın 2006-cı ildən Dünya Türklərinin Həmrəylik Günü kampaniyasını başladığını qeyd edib. Onun sözlərinə görə Türkiyənin Türk Ocaqları təşkilatının da dəstəyi ilə bu kampaniyanı genişləndirmək mümkün olub. O, Naxçıvanda 2009-cu ildə Türk Konseyinin qurulmasını, bununla da xəyallarda yaşadılan Turan ideyasının həyata keçməsini xüsusi vurğulayıb. Təşkilat sədri həmin ildə eyni zamanda 3 oktyabr tarixinin Türk Dövlətlərinin Birliyi Günü kimi qeyd edilməsini də müham addım kimi alqışlayıb: “Bizim bundan sonrakı işimiz bu fəaliyyətlərə ictimai dəstək vermək olmalıdır. Arxayınlaşmaq olmaz və çoxlu çalışmaq lazımdır”. M.Göyüşlü Özbəkistanın Türk Konseyinə qoşulmasını yüksək qiymətləndirib. Təşkilat sədri gələcəkdə Türk Konseyinin gənclər, media, QHT-lərlə bağlı da strukturlarının yaradılmasını, 3 oktyabr tarixinin türk dövlətlərində rəsmi bayram kimi qeyd edilməsini təklif edib. O, bu günlərə gəlib çatmaqda şəhidlərimizin, türklük uğrunda mübarizə aparan şəxslərin böyük rolu olduğunu deyərək Qarabağ probleminin həllində Türk Konseyinin aktiv olacağına inamını ifadə edib.
Bakı şəhər Gənclər və İdman Baş İdarəsinin rəis müavini Aydın Yusifov, Hilal təşkilatının sədri Arzuman Abdulkərimov, Gənclərin Töhfəsi təşkilatının sədri Asim Vəliyev, Türkiyə Universitetləri Məzunları Birliyinin sədri Çingiz Bayramov 3 oktyabr tarixinin və Türk Konseyinin yaradılmasının əhəmiyyətindən danışıblar. Çıxışçılar türki xalqlarının dünyaya sülh, rifah, ədalət, inkişaf gətirdiklərini qeyd ediblər. Natiqlər Naxçıvanda təsis edilən Türk Dövlətlərinin Əməkdaşlıq Şurasının bu baxımdan çox böyük addım olduğunu bəyan ediblər.
Tədbirin bədii hissəsində vətənpərvər mahnıların mahir ifaçısı Şəmistan Əlizamanlının, şair-qəzəlxan Hacı Mehtabın, aşıq Fariz Təmirovun, Nuray Rəhmanın, Türkan Məmmədovanın ifasında musiqilər, şeirlər ifa edilib. Eyni zamanda tədbirin baş tutmasında əməyi keçən, türk birliyi uğrunda çalışmalar həyata keçirən şəxslər Fəxri Fərmanla mükafatlandırılıblar.
Qeyd edək ki, Türk Dövlət Başçıları 2009-cu ildə hər il 3 oktyabr tarixininTürk Dövlətlərinin Birliyi Günü, başqa adla desək Dünya Türklərinin Həmrəylik Günü kimi keçirilməsi ilə bağlı qərar qəbul ediblər.
