Keçmiş sevgilisi tərəfindən üzündən güllələnən 23 yaşlı qız möcüzəvi şəkildə həyatda qalıb. Braziliyada baş verən hadisənin anbaan görüntüləri geyim mağazasına quraşdırılmış kameralar tərəfindən qeydə alınıb.
Gununsesi.org xəbər verir ki, bu barədə “Daily Mail” xəbər yayıb.
Kadrlardan görünür ki, şübhəli maskalı halda mağazaya girərək, üç qadını başqa otağa yollayır, gənc qıza isə kassa aparatının yanına getməyi əmr edir.
Pulları götürdükdən sonra isə mağazadan çıxmaq əvəzinə kassa aparatının arxasında duran Renata Almeydaya atəş açır və hadisə yerindən qaçır.
Almeyda dərhal yerli xəstəxanaya çatdırılıb. Onun vəziyyəti ağır qiymətləndirilir.
Qızın qohumları isə hadisənin, əslində, qarət məqsədi daşımadığını, qızın keçmiş sevgilisi tərəfindən intiqam məqsədilə həyata keçirildiyini iddia edirlər.
“Müşahidə kameralarından da görünür ki, gənc qız cinayətkarın bütün tələblərini sözsüz yerinə yetirməsinə baxmayaraq, güllələnir. Buna görə hər kəs onun qarət deyil, qızı öldürmək məqsədilə oraya gəldiyini düşünür”, – deyə hüquq-mühafizə idarəsindən bildirilib.
Hadisə ilə əlaqədar cinayət işi açılıb, istintaq davam edir.
