“Orfoqrafiya lüğəti yaratmaq ciddi, çox zəhmət tələb edən bir işdir. Təbii ki, bu lüğətdə, orfoqrafik qaydalarda dəyişikliklər labüddür. Lakin bu işlər yalnız bir qrupun istəyi və iradəsi ilə ola bilməz”.
Bunu Gununsesi.info-ya keçmiş Tələbə Qəbulu üzrə Dövlət Komissiyasının (TQDK) sabiq sədri Vurğun Əyyub deyib.
Onun sözlərinə görə, bunun üçün prinsiplər, meyarlar müəyyənləşdirilməli, dilçi alimlər, ali və orta məktəb müəllimləri arasında geniş və açıq müzakirə təşkil edilməlidir: “Unutmaq lazım deyil ki, bu dəyişikliklər dərsliklərdə, tədris vəsaitlərində də dəyişiklik tələb edir. Dərslik, tədris vəsaitlərinin çapı isə xeyli maliyyə və vaxt tələb edir. Ona görə də, bu lüğəti hazırlayanlar Təhsil Nazirliyi və digər qurumlarla vaxt məsələsini müzakirə edərək, razılığa gəlməlidirlər”.
Cəmiyyətin bu dəyişikliklərə qınağına gəldikdə isə sabiq TQDK sədri deyib ki, yeni elan olunmuş qaydalar, lüğətə təzə daxil edilmiş sözlər barədə kəskin, çox zaman da haqlı etirazlar söylənilməkdədir: “Orfoqrafiya problemləri üzərində çalışanlar onları diqqətlə araşdırıb nəticə çıxarmalıdırlar”.
Mürtəza
Gununsesi.info
