Bu gün Bakı Apellyasiya Məhkəməsində ANS Müstəqil Yayım və Media Şirkətinin Milli Televiziya və Radio Şurasına (MTRŞ) qarşı şikayəti üzrə hakim Elşanə Vəliyevanın sədrliyi ilə məhkəmə prosesi keçirilib.
Gununsesi.info-nun əməkdaşının məhkəmə zalından verdiyi xəbərə görə, cavabdeh tərəfin nümayəndəsi, MTRŞ-in Aparat rəhbəri Toğrul Məmmədov iddianın doğru instansiyaya ünvanlanmadığını əsas gətirərək, hakim Elşanə Vəliyevadan iddianın rədd edilməsini tələb edib. O, bildirib ki, ANS Müstəqil Yayım və Media Şirkətinin Milli Televiziya və Radio Şurasına (MTRŞ) qarşı şikayətinin Apellyasiya Məhkəməsinə ünvanlaması doğru deyil, İnzibati Prossesual Məcəlləsinin 128.2 maddəsinə uyğun olaraq, iddiaya inzibati orqan tərəfindən baxılmalıdır: “Hazırki halla bağlı da iddiaya 1 saylı İnzibati İqtisad Məhkəməsinə müraciət edilməlidir. Ona görə də hesab edirəm ki, iddia rədd edilməli və ya baxılmamış saxlanmalıdır”- deyə, MTRŞ-in Aparat rəhbəri bildirib.
Proesesdə ANS Müstəqil Yayım və Media Şirkətinin hüquqlarını qoruyan hüquqşunas Sevda Məhərrəmova bildirib ki, movcud qanunvericiliyə uyğun olaraq, bundan əvvəl də mənafeyini qoruduğu şirkət “Salam Azərbaycan” və “Xoşqədəmlə səni axtarıram” verilişərinin MTRŞ tərəfindən yayımı 1 aylıq dayandırıldıqda da, aidiyyatı üzrə Apellyasiya məhkəməsinə müraciət edilmişdi. Bu günədək ANS Müstəqil Yayım və Media Şirkətinin MTRŞ-nın qərarlarıyla bağlı Apellyasiya Məhkəməsinə müraciət edildiyini vurğulayan S.Məhərəmmova konkret faktları məhkəmənin diqqətinə çatdırıb. Preosesdə tərəflər arasında mübahisə baş verib. Hər iki tərəf haqlı olduğunu sübuta yetirmək üçün tutarlı arqumentlər səsləndiriblər.
Daha sonra ANS Müstəqil Yayım və Media Şirkətinin sahibi Vahid Mustafayev məhkəməyə əlavəsi olduğunu bildirib. V. Musatafayev qeyd edib ki, bu məsələylə əlaqədar bizim istinad etdiyimiz qanun maddəsi müraciət üçün Apellyasiya Məhkəməsinin ünvanını göstərir: “Amma eyni zamanda, bu məsələylə əlaqəli hansısa anlaşılmazlıq, qanunvericilikdə hansısa boşluq varsa, onda yurisdiksiyada president məsələsi ön plana çıxır. Bizim presidentimiz var, bununla əlaqəli bütün məhkəmə çəkişmələrimiz burada keçib. Bu sonuncu məhkəmə – hardakı lisenziyamızı əlimizdən alıblar. Bununlada əlaqəli xahiş edirəm ki, bunu nəzərə alasınız. İkincisi, xahiş edirəm, nəzərə alasınız ki, söhbət hansısa bir canidən, düşməndən getmir. Söhbət böyük bir təşkilatdan gedir. Hansı ki, 25 il Azərbaycana qulluq edib və 1000-dən çox əməkdaşı hazırda ağır sosial vəziyyətdə yaşayır. Onlar maaşsız, işsiz qalıblar. Qanunvericilikdə belə yurisdiksiyalar, hansısa boşluqlar varsa, mənə elə gəlir ki, iddiaçının tərəfini tutmaq lazımdır. Xahiş edirəm, onun ağır vəziyyətini nəzərə alaraq, bu məsələyə son qoymaq üçün əlinizdən gələni edəsiniz. Təşəkkür edirəm”- deyə, o,bildirib.
Sonra məhkəmə müşavirəyə gedib. 10 dəqiqəlik müşavirədən sonra məhkəmə işi baxılmamış saxladığını elan edib. Hakim Elşanə Vəliyeva bildirib ki, bu iş üzrə iddiaya 1 saylı Bakı İnzibati-İqtisadi Məhkəməsində baxılmalıdır. Sənədlər baxılması məhkəmə tərəfindən sözügedən məhkəməyə göndəriləcək.
Qeyd edək ki, MTRŞ ANS TV-nin yayımının bir ay müddətində dayandırılması barədə qərar qəbul edib. ANS həmin qərarın ləğv edilməsini istəyir.
Xatırladaq ki, iyulun 29-da isə Bakı Apellyasiya Məhkəməsi MTRŞ-nın “ANS Müstəqil Yayım və Media” Şirkətinin fəaliyyətinə xitam verilməsi (lisenziyanın ləğvi) barədə məhkəmə iddiasına baxıb və şirkətin lisenziyası ləğv edilib.
Gülnaz Qənbərli
Gununsesi.info
